Камбож улс коронавирус халдвараас урьдчилан сэргийлэх үүднээс хилээ хаагаад байгаа ч хүн худалдаалах гэмт хэргийн тоо, ялангуяа Камбожийн хөдөө орон нутгийн ядуу мужуудад харьяалагддаг 15-25 насны эмэгтэйчүүдийн хулгай өнгөрсөн оноос хойш хоёр дахин нэмэгджээ.

Тэднийг хөрш зэргэлдээх хилийн боомтоор дамжуулан зөөвөрлөж байна. "Чаб Дай" эвслийн хөтөлбөрийн менежер Чан Сарон A24-т өгсөн ярилцлагадаа гадаадад сүйт бүсгүй болж худалдаалагдсан охидын тоо 2021 оны 1-р улиралын байдлаар өнгөрсөн жилийнхтэй харьцуулахад хоёр дахин нэмэгдсэн бөгөөд зуучлагчид охидод ажлын байр, мөнгө, гадаадын улс орнуудын баячуудтай гэрлэх амлалт өгч байгааг онцоллоо. Тэдгээр охид Камбож, Вьетнамын хилийг хууль бусаар Ханой хотоор дамжин нэвтэрч тэндээс бусад улс руу зөөвөрлөгддөг байна. Эдгээр охидтой гэрлэхээр амласан хүмүүс нь ихэвчлэн хөгшин, хөгжлийн бэрхшээлтэй, ядуу байдаг бөгөөд гэрлэсний дараа зарим охидыг өрөөнд хорьж, бэлгийн хүчирхийлэлд өртөж байхад бусад охид Хятад нөхрийн гэр бүлийг тэжээх мөнгө олохын тулд үйлдвэрт олон цагаар ажиллахаас өөр аргагүй байдалд орж байгаа аж.

"Чаб Дай" эвслийн менежер Чан Сарон, "2020, 2021 онд Ковид 19 Камбожид тархах үед хуурай газрын хил дамнуулан хүний наймаа ихэсч байгааг бид ажигласан. Хэдийгээр Камбож-Тайланд, Камбож-Вьетнамын хоорондох хил хязгаарыг албан ёсоор хаасан боловч хуурай газрын хилээр дамжуулан Хятад руу хүн худалдаалах гэмт хэрэг харьцангуй өндөр байсан.
2021 оны 1-р улиралд Чаб Дай эвсэл нь хүний наймааны 50 хэрэг дээр ажилласан. Хэрэв бид үүнийг 2020, 2019 оны эхний улиралтай харьцуулж үзвэл тухайн үед 15-25 хэрэг дээр ажилладаг байсан. Тэгэхээр ковид-19 цар тахлын үеэр хүний наймааны хэрэг хоёр дахин нэмэгджээ. Эдгээр 50 тохиолдол бүгд БНХАУ-д зохион байгуулалттай гэр бүл болох зорилгоор худалдагдсан хүмүүс юм. Түүнчлэн Малайз, Тайланд руу хүн худалдаалах гэмт хэрэг гарч байна.
Зарим тохиолдолд эмэгтэйчүүдийг (хохирогчид) баян Хятад эрчүүдтэй гэрлэнэ гэж амласан. Гэхдээ тэд Хятадад ирэхэд зуучлагчдын тодорхойлсноос өөр зүйл угтаж байна. Хохирогчдоос хөгжлийн бэрхшээлтэй эрчүүд, хөгшин эрчүүд, түүн шиг санхүүгийн хувьд ядуу эрчүүдтэй гэрлэхийг хүсч байна. Гэрлэсний дараа эмэгтэйчүүдийг нөхрийнхөө гэр бүлийн гишүүдээс дорд үздэг, тэднийг хүчирхийлдэг, зарим тохиолдолд эмэгтэйчүүдийг өрөөнд нь хорьж байсан. Нөхрийн гэр бүлийн бусад гишүүд заримдаа түүнтэй бэлгийн харьцаанд ордог байсан гэх мэт маш олон асуудлууд гарч байна. Эдгээрийг эмэгтэйчүүдтэй ярилцлага хийснээр олж мэдсэн зүйлсүүд юм. Үүнээс гадна гэрлэсний дараа хосууд таарамж муутай байсан тул нөхөр нь түүнийг зуучлагч руу буцааж, зуучлагч дахин өөр хүнд зарах тохиолдлууд гарч байна. Өөр нэг жишээ бол эмэгтэйчүүдийг шинэ нөхрүүд нь Хятад дахь нөхрийнхөө гэр бүлийг тэжээх мөнгө авахын тулд үйлдвэрт ажиллахаар шахаж байсан явдал юм.
Камбож улсаас худалдаалагдах хүний тоо хоёр зүйлээс болж өссөн гэж бодож байна. Нэгдүгээрт, энэхүү тахлын үеэр хохирогчид зарим аж ахуйн нэгжүүд хаагдсанаас болж ажилгүй болж, тэд шинэ ажил олж чадахгүй байна. Хоёрдахь зүйл бол өнөө үед Камбожийн засгийн газар ковид-19 тархахтай тэмцэх ажилд завгүй байгаа тул хил дээр хяналт бага байна.
Бид хүний наймаа, орчин үеийн боолчлол, бэлгийн хүчирхийлэл, бэлгийн мөлжлөгтэй тэмцэхэд анхаарч ажиллаж байна. Бидний хийсэн ажилд үндэслэн хохирогчдын дийлэнх нь хүн худалдаалах, хүчээр гэрлэх, бэлгийн хүчирхийллийн золиос болсон 15-25 насны хүүхдүүд, насанд хүрсэн эмэгтэйчүүд байна. Энэ бүгдээс дүгнэхэд хөдөө орон нутгийн, хөрөнгө муутай айлын хүүхдүүд илүү их хохирч байна гэх хэлэхэд болохоор байна" гэжээ.

Эх сурвалж: А24 агентлаг