Цаг уурын байгууллагаас өнөөдрөөс эхлэн эрс хүйтэрч, цасан болон шороон шуурга шуурч болзошгүй талаар сэрэмжлүүлсэн. Тодруулбал, өнөөдөр буюу 18-ны өдөр Говь-Алтай, Баянхонгор, Өвөрхангай, Өмнөговь, Дундговийн нутгаар салхи секундэд 28 метр, зарим үед секундэд 34 метрийг давж ширүүсэж, хүчтэй шороон шуурга шуурна.

18-19-нд шилжих шөнө:

Хүчтэй салхи, шороон шуурга: Дундговь, Дорноговь, Говьсүмбэр, Хэнтий, Дорнод, Сүхбаатарын нутаг, Төв болон Өмнөговийн зүүн хэсгээр салхи секундэд 18-20 метр, зарим үед секундэд 24 метрийг давж ширүүсэж, шороон шуурга шуурна.

Цасан шуурга: Төв, Сэлэнгийн зүүн, Хэнтийн баруун хэсгээр цасан шуурга шуурна.

19-ний өдөр:

Хүчтэй салхи: Дорнод, Сүхбаатарын нутаг, Дорноговийн зүүн хэсгээр салхи секундэд 18-20 метр, зарим үед секундэд 24 метрийг давж ширүүснэ.

Цасан шуурга: Хэнтий, Дорнодын хойд хэсгээр цасан шуурга шуурна.

Улаанбаатар хотод өдөртөө +16...+18 хэм дулаан байх ч үдээс хойшдоо эрс хүйтэрнэ гэж ЦУОШГ-аас мэдээллээ.