Казахстанд болж байгаа чөлөөт бөхийн Азийн аваргын тэмцээний эрэгтэйчүүдийн тэмцээн үргэлжилж байна. Эрчүүд 57, 65, 70, 79, 97 кг-ын жингийн барилдаанаар тулаанаа эхлүүлсэн юм.

65 кг-д Төмөр-Очирын Тулга Киргизийн Улукбек Жолдошбековтэй эхний барилдаанаа хийж, 4:0 ялалт байгууллаа. Дараа нь Узбекистаны Жалоловтой хагас шигшээд учирч, түүртэх зүйлгүй, 5:2 оноогоор яллаа.

Манай бөх алтан медалийн төлөө Ираны бөх 2022 оны дэлхий, Азийн аварга Рахман Амузадтой барилдав. ДАШТ, олимпын өмнөх сорилт юм.

Эхний үед манай бөх Ираны аваргыг огт юм хийлгэсэнгүй. Торгуулиар нэг оноото тэргүүлж явлаа. Харин хоёрдугаар үед иран бөх ажиллаж эхэлсэн. Т.Тулга гарт хий эргэхдээ хий гаргаж, ардаа гаргаад хоёр оноо алдсан. Нэмж торгуулаад 30 секунд оноо авалгүй, оноо 1:3 болсон юм.

Үлдсэн хугацаанд урагш явж, тасралтгүй ажnлласан ч оноо авч чадсангүй ялагдлаа. Т.Тулгын Азийн анхны медалиа мөнгөөр эхлүүллээ.