Ерөнхийлөгч асан Х.Баттулга МОАХ-ын газрыг Хөгжлийн банкинд барьцаалж, зээл авахыг "Пирамид Орд" ХХК-д зөвшөөрсөн бичгийг УИХ-ын гишүүн Н.Энхбаяр цахим сүлжээндээ нийтэллээ. Тэрбээр "Улсын Ерөнхийлөгч болчихоод улсынхаа газрыг Төрийн бус байгууллагын тэргүүн гэдгээр Хөгжлийн банкинд барьцаалж мөнгө “…гаад” л явахын. Улс төрчдийг Төрийн бус байгууллагуудаас салгаж холдуулья гээд байгаагийн сонгодог дээд жишээ" гэжээ.

"Пирамид Орд" нь Хөгжлийн банкнаас 15 тэрбум төгрөгийн зээлийг 2018 оны зургаадугаар сард авсан байдаг. Ингэхдээ "Буман залуус" 296 айлын орон сууцын төслийг хэрэгжүүлэх зорилгоор авсан байна. Улмаар одоо хүртэл зээлээ төлөөгүй, чанаргүй зээлдэгчдийн ангилалд багтсан байгаа бөгөөд Хөгжлийн банк тус компанийг шүүхэд өгчээ. Тодруулбал, "Пирамид Орд" нь Хөгжлийн банкинд 23.1 тэрбум төгрөгийг төлөх ёстой аж.