АНУ 20 сарын турш хэрэгжүүлсэн хоригоо цуцалж даваа гарагт гадны иргэдэд хилээ нээлээ. Цар тахлын эхний давлагаа дэгдэх үеэр Ерөнхийлөгч асан Дональд Трамп хориг тогтоох шийдвэр гаргаж байсан юм. Дээрх хоригийн улмаас Их Британи, Европын холбоо тэргүүтэй 30 гаруй орны иргэдийг нэгдсэн улсын хилээр нэвтрэх боломжийг хязгаарласан нь гэр бүлийн гишүүдийг салган тусгаарлаж, аялал жуулчлалын салбарт хүнд цохилт болсон билээ.
Вакцины бүрэн тун хийлгэсэн гадны иргэдийг шинжилгээнд үндэслэн хил нэвтрүүлэх болсон нь агаарын тээврээр зорчих урсгалыг эрс нэмэгдүүлэх төлөвтэй байна. Тухайлбал, АНУ хилээ нээх тухай мэдэгдэл гарсны дараа олон улсын нислэгийн талаарх интернэт хайлт 338 хувиар өсжээ.
