Засгийн газрын өнөөдрийн ээлжит хуралдаанаар баялаг бүтээгчдийг дэмжих хууль эрх зүйн орчныг сайжруулах, түүнтэй уялдуулж гадаадын хөрөнгө оруулагчдыг дэмжих хуулийн төслүүдийг ирэх намрын УИХ-ын ээлжит чуулганаар өргөн барьж хэлэлцүүлэх тухай тогтоол баталлаа. Тодруулбал, экспортыг дэмжиж, валютын нөөцийг нэмэгдүүлэх бодлогын хүрээнд Баялаг бүтээгчдийг дэмжих, эрх зүйн таатай орчныг бүрдүүлэх чиглэлээр хуулийн төсөл боловсруулж буйг мэдээллээ. Багц хуулийн төслийг дагалдуулж гадаадын хөрөнгө оруулагчдыг дэмжих мөн хуулийн төслийг өргөн барихаар болж байна. Ингэснээр гадаадын хөрөнгө оруулагчдын гомдол, маргааныг шуурхай шийдвэрлэх хууль эрх зүйн орчин бүрдэх юм. Өнгөрсөн хугацаанд нийт 110 гомдол бүртгэгдсэнээс зөвхөн 27 нь шийдэгдсэн байна. Гаргасан нийт гомдлын 60 гаруй хувь нь уул уурхай, сэргээгдэх эрчим хүчний салбарт хамаарч буй. Цаашид гадаадын хөрөнгө оруулагчдын гаргасан гомдол, маргааныг тухай бүрд нь шийдвэрлэж, хөрөнгө оруулалтын үр өгөөжийг сайжруулах чиглэлд ЗГ бодлого гаргаж ажиллахаа мэдэгдлээ.