Монгол Улс 2030 онд 2 сая жуулчин хүлээн авахаар зорьж байгааг Соёл, спорт, аялал жуулчлал, залуучуудын сайд Ч.Номин мэдээлэв. Ингэснээр манай улсын дотоодын нийт бүтээгдэхүүний 10 орчим хувийг аялал жуулчлалын салбараас бүрдүүлэх, цаашид эрчимтэй хөгжиж буй олон улсын зах зээлийг Монголд илүү төвлөрүүлнэ гэж үзэж байгаа юм.
Үүний тулд ойролцоогоор 11 их наяд төгрөгийн хөрөнгө оруулалт шаардлагатай болохыг салбарын сайд дурдлаа. Харин төрийн зүгээс томоохон дэд бүтцийг шийдэх, нислэгийн тоог нэмэгдүүлэх, хот хоорондын дэд бүтцийг сайжруулах зэрэг томоохон хөрөнгө оруулалт хийх шаардлагатай гэж үзэж байгаа юм. Ялангуяа дөрвөн улирлын аялал жуулчлалыг хөгжүүлснээр нэг ам.доллар тутамд 6 орчим ам.долларыг эргэлдүүлэх боломжтой гэсэн эдийн засгийн судалгаа гарсан болохыг салбарын сайд дурдаж байлаа.
