Өвөрхангай аймгийн онцгой комиссын шийдвэрээр Улаанбаатар хотод байгаа аймгийнхаа иргэдийг татан авах ажлыг зохион байгуулж байна. Одоогоор нутаг буцах хүсэлтэй 1400 иргэн байгаа аж. Улаанбаатарт байгаа Өвөрхангайн иргэдийг нутаг буцаах ажлыг энэ сарын 22-ноос 27-нд зохион байгуулж байгаа юм.

Улаанбаатараас ирэх иргэд PСR шинжилгээ заавал өгсөн байхаас гадна шинжилгээний хариу нь 24 цагийн хугацаанд хүчинтэй аж. PCR шинжилгээгүй зорчсон иргэдийг 14 хоног тусгаарлаж, тусгаарлалтын төлбөрийг нь төлүүлэхээс гадна 500 хүртэлх мянган төгрөгөөр торгож, тээврийн хэрэгслийг 14 хоног журамлахыг Өвөрхангай аймгийн Цагдаагийн газраас мэдэгдлээ.

Нутаг буцахаар бүртгүүлсэн иргэдийн 400 гаруй нь хувийн тээврийн хэрэгслээр зорчих бол 1000 орчим иргэн нийтийн тээврийн хэрэгслээр зорчих хүсэлтээ өгсөн байна. Түүнчлэн иргэдийн 500 гаруй нь Арвайхээр суманд, 900 орчим нь бусад суманд очихоор бүртгүүлжээ.