ЭЦА-наас өнөөдөр "Илрүүлэлт-2022" арга хэмжээний талаар мэдээлэл өглөө. Эрүүгийн цагдаагийн албаны Эрэн сурвалжлах хэлтсийн дарга, цагдаагийн хурандаа Д.Очгэрэл "Илрүүлэлт арга хэмжээг ЦЕГ, ШШГЕГ хамтран зохион байгуулсан. Энэ ажлын хүрээнд энэ сарын 9-нөөс хойш 54 этгээдийг олж тогтоосон. Үүнд иргэний хэрэгт буюу шүүхийн шийдвэр биелүүлэхээс зайлсхийсэн 29, тэнсэн албадлагын арга хэмжээ авагдсан этгээд 1, торгох ялаар шийтгэгдсэн 1, нийтэд тустай ажил хийлгэхээр ял шийтгэгдсэн 4, зорчих эрхийг хязгаарлуулсан, цахим бугуйвч зүйсэн 19 этгээдийг олж тогтоосон.

2017 оноос хойш хэрэгжиж эхэлсэн зорчих эрхийг хязгаарлуулах ялаар шийтгүүлсэн 117 хүн оргон зайлснаас нь 100-г нь олж тогтоосон. Одоо 17 хүнийг эрэн хайж байна.

Илрүүлэлт арга хэмжээ энэ сарын 12-ноос ирэх арваннэгдүгээр сарын 1-н хүртэл зохион байгуулагдана. Эхний 16 хоногийн дүн мэдээгээр цагдаагийн байгууллагийн эрэн сурвалжлах санд байсан 1725 хүн, мал, эд зүйлийг олж тогтоон, эрэн сурвалжлах ажиллагааг зогсоосон. Үүнд оргодол 106, гэмт хэрэгт сэрдэгдсэн этгээд 658, сураггүй алга болсон 91, үүнээс насанд хүрээгүй буюу 0-17 насны 3, хэн болох нь тогтоогдохгүй цогцос 5, галт зэвсэг 3 гэх мэт байна.