Улсын онцгой комисс өнөөдөр хуралдан гаргасан шийдвэрээ танилцуулж байна. Хуралдаанаар 13 салбарт үйл ажиллагаа явуулдаг аж ахуйн нэгж, албан байгууллагын автомашинд тусгай зөвшөөрөл олгож байсан журмыг цуцалжээ.

Энэ тухай ОБЕГ-ын дарга Г.Ариунбуян "Автомашин тусгай зөвшөөрлийг өнөөдөр түр зогсоолоо. Цаашид зайлшгүй шаардлагатай тусгай чиг үүргийн байгууллагад ажиллаж буй албан хаагчид зөвхөн ажлын үнэмлэхээр нь зохицуулахаар шийдвэрлэсэн байна" гэлээ. Түүнчлэн албаныхан иргэд тусгай зөвшөөрлийг бичиг хуурамчаар үйлдэх, байгууллагатай хамааралгүй машинд тусгай зөвшөөрөл хүсэх гэх мэт зөрчлүүд илэрч байгаа тул үргэлжлүүлэх боломжгүй байгааг дурджээ. Нэн шаардлагатай ажлаар явж байгаа иргэдийг зөвхөн ажлын үнэмлэхээр автозамын хөдөлгөөнд оролцуулах юм.