Цахим орчинд "Кето буюу эрүүл мэндийн хоолыг зах зээлийн үнээс дөрөв дахин хямд үнээр зарж байна" гэх зарын дагуу өнгөрсөн сарын 25-ны өдөр Сүхбаатар дүүргийн нэгдүгээр хорооны нэр бүхий иргэд мөнгөө урьдчилж шилжүүлээд, залилуулсан тохиолдол бүртгэгджээ.
Сүхбаатар дүүрэгт л гэхэд энэ оны нэгдүгээр сарын байдлаар 100 гаруй иргэн энэ төрлийн залиланд өртсөн байна.
Залилагчид цахим орчинд хуурамч хаяг нээн, бусад хоолны газруудын зургийг хуулбарлан ашиглаж иргэдээс төлбөрийг нь урьдчилан авч залилдаг аж. Иймд иргэд та бүхэн цахим худалдаа хийхдээ мэдээллийг нь сайтар нягталж, урьдчилгаа төлбөр шилжүүлэхгүй байхыг цагдаагийн байгууллагаас анхаарууллаа.
