Монгол Улсын Их Хурлын Байгаль орчин, хүнс, хөдөө аж ахуйн байнгын хорооноос зохион байгуулж буй “Агаарын бохирдлыг бууруулах хүрээнд утааны асуудлаарх бодлого, шийдвэрийн хэрэгжилтийн үр дүн, шийдэл” ерөнхий хяналтын сонсгол үргэлжилж байна.

Энэ үеэр НМХГ-ын дарга асан Н.Эрдэнэчулуун " 2019, 2020 онуудад Улаанбаатар хотын утаа эрс буурсныг бүх хүн мэдэж байгаа. 2018 онд түүхий нүүрс хэрэглэхийг хориглосон ЗГ-ын 62 дугаар тогтоолын хэрэгжилтийг хангуулахаар НМХГ ажиллахдаа Тавантолгой түлш компанийн үйлдвэрлэл, автомашины яндангийн шүүлтүүр, уурын зуухны шүүлтүүр зэрэг 6 чиглэлд 500 гаруй байцаагч хяналт тавьж ажиллаж байсан. Тухайн үед Тавантолгой түлшний үйлдвэрт MNS 5679:2019 гэсэн стандарт мөрдүүлж ажиллаж байсан. Гэтэл тус компани 2022 онд стандартаа өөрчлөөд түлш үйлдвэрлэхдээ Монгол Улсад батлагдаагүй СТАНДАРТГҮЙ барьцалдуулагч нийлүүлж байна. Саяхан үйлдвэрт очиж танилцахад Лаборатори нь итгэмжлэгдээгүй байсан. Итгэмжлэгдээгүй лабораторидоо дээж аваад өөрсдөө түүндээ дүгнэлт гаргаж байгаа нь хууль бус. Утааны асуудал гамшгийн хэмжээнд хүрсэн нь хяналтгүй байдалтай шууд холбоотой" гэв.