Прокурорын байгууллага 2025 оны 01 дүгээр сарын 06-наас 10-ны өдрийг хүртэл хугацаанд хэрэг бүртгэлтийн 46518, мөрдөн байцаалтын 1697 хэрэгт хяналт тавьж, эрүүгийн 268 хэрэгт яллах дүгнэлт үйлдэн шүүхэд шилжүүллээ.
Үүний дотор Эрүүл мэндийн даатгалын ерөнхий газрын албан тушаалтнууд бусдын ашиг сонирхлын үүднээс албаны чиг үүргээ хэрэгжүүлсний хариуд хахууль авсан, мөнгө угаасан, хахууль өгсөн хэрэг багтсан байна. Тодруулбал, Эрүүл мэндийн даатгалын газрын дарга асан Л.Бямбасүрэн болон ЭМДЕГ-ын нэхэмжлэлийн хяналтын хэлтсийн дарга асан Т нар улсын болон хувийн эмнэлгүүдэд олгодог даатгалын санхүүжилтээс хуурамч бичилт хийх замаар зардлыг нь өсгөж, дундаас нь хувь авдаг байсан гэх мэдээлэл гарсан байдаг. Тиймээс Эрүүгийн хуулийн 22.4 дүгээр зүйлийн 1, 2 /Нийтийн албан тушаалтан хахууль авах/, 22.5 дугаар зүйлийн 1 /Хахууль өгөх/-т зааснаар яллах дүгнэлт үйлдэн Хан-Уул дүүргийн эрүүгийн хэргийн анхан шатны шүүхэд шилжүүлсэн байна.
