Апофис солир 2068 онд дэлхийтэй мөргөлдөх магадлалд нөлөөлж болзошгүй өөрчлөлт гарч байгааг Хавайн Их сургуулийн Одон орны хүрээлэнгийн эрдэмтэд илрүүлжээ.

Солирыг ажиглах явцдаа судлаачид өдрийн цагаар халж, шөнөдөө хөрсөн гадаргуугаас үүссэн дулааны цацрагийн улмаас тэнгэрийн биет сул реактив импульс хүлээж авдаг Ярковскийн нөлөөний улмаас тойрог замаасаа жилд 170 метрээр хазайж байгааг илрүүлсэн байна. Үүнээс өмнө эрдэмтэд 2068 онд дэлхийтэй мөргөлдөх боломжгүй гэж үзэж байсан бол одоо мөргөлдөх магадлалыг тогтоохын тулд ажиглалт хийх зайлшгүй шаардлагатай болжээ.

325 метрийн голчтой Апофис хэмээх солирыг 2004 онд нээсэн бөгөөд тухайн үедээ ихээхэн шуугиан тарьсан юм. Анхны тооцоогоор, эртний Египетийн харанхуй, сүйрлийн бурхны нэрээр нэрлэсэн уг солир 2029 онд дэлхийтэй мөргөлдөх магадлал 2.7 хувьтай байжээ. Гэвч эрдэмтдийн тооцоолсноор, давхардсан тоогоор сансрын уг биет манай гараг руу 12 удаа ойртож, гурван удаа ойрхон зайтай нисэж өнгөрнө. Энэ нь 2029 оны дөрөвдүгээр сар, 2036 оны гуравдугаар сар, мөн 2068 оны дөрөвдүгээр сард тохиох юм. 2029 оны дөрөвдүгээр сарын 13-нд уг солир дэлхийн төвөөс 37600 км-ийн зайтай нисэж өнгөрнө гэж тооцоолсон байна.