Засгийн газраас зарласан "Шилэн" ажиллагааны хүрээнд өнөөдөр Кино урлагийг дэмжих сан тэргүүтэй таван сангийн мэдээллийг олон нийтэд нээлттэй байршууллаа. Тэгвэл Хилийн чанадад байгаа Монгол улсын иргэдэд туслах сан нь 2009 оноос хойш нийтдээ 3 тэрбум 125 сая төгрөгийн тусламж хэлбэрээр олгожээ. Тухайлбал, Малайзад амь насаа алдсан загвар өмсөгч Ш.Алтантуяагийн өмгөөллийн зардалд 2018 онд тус сангаас 15 сая төгрөгийг ГХ-ны сайдын тушаалын дагуу олгож байжээ.

Эргэн сануулахад, Ш.Алтантуяа нь 2006 онд Малайзад хэрцгийгээр амь насаа алдсан. Удаан хугацаанд шийдэгдэлгүй явсан эл хэрэгт тус улсын шүүх өнгөрөгч оны 12 дугаар сард шийдвэр гаргасан юм. Ингэхдээ талийгаач Ш.Алтантуяагийн гэр бүлд 1.53 сая ам.долларын нөхөн төлбөр төлөхийг тус улсын Засгийн газар болон өөр гурван хүнд шийдвэрлэсэн байдаг.