Улс төрд ойрын хугацаанд хүлээгдэж буй хамгийн сонирхолтой томилгоо бол МАН-ын генсекийн асуудал юм.

Ерөнхий сайд Л.Оюун-Эрдэнэ намынхаа ерөнхий нарийн бичгийн даргыг дүрмээ зөрчүүлэн байж засагтаа авч “дарснаас” хойш хоёр сар гаруй хугацаа өнгөрсөн. Засагт оруулахдаа Д.Амарбаясгалан, Л.Оюун-Эрдэнэ хоёр намын дүрмээ өөрчилж, Д.Амарбаясгаланг генсекээр нь үргэлжлүүлэн ажиллуулах төлөвлөгөөг гаргасан байдаг.

Гэвч үүнийг сонссон Ерөнхийлөгч У.Хүрэлсүхийн нам руугаа хандах амбиц цухалзаж, намын генсекээр тамгын газрын дарга Я.Содбаатарыг томилуулахаар ил далдаар зүтгүүлэх болов. Өөрөөр хэлбэл, намын дарга Л.Оюун-Эрдэнэ стратегийн чухал ач холбогдолтой албан тушаалаа Ерөнхийлөгчид өгөх үү, авч үлдэх үү гэдэг сонголтын өмнө ирсэн юм. Ерөнхийн нарийн бичгийн дарга гэдэг бол намын даргын нам дотроо хийх хамгийн чухал албан тушаал. Тиймээс аргаа барьсан Ерөнхий сайд Л.Оюун-Эрдэнэ генсект Н.Энхбаатарыг томилох хувилбарыг ч гаргасан тухай МАН дотор дуулдах болсон.

Тэгвэл өмнөх нийтлэлд өгүүлж байсанчлан Я.Содбаатар, Н.Энхбаатар, Д.Амарбаясгалан гэх “гурван муу” сонголтоос МАН-ын дарга хамгийн гайгүй муу сонголтоо хийсэн бололтой.

Тэр нь 12 сарын 6-нд дүрмээ өөрчилж, Д.Амарбаясгаланг генсекээр нь үлдээх хувилбар юм.

Учир нь хоёр хоногийн өмнө ЗГХЭГ-ын дарга Д.Амарбаясгалан нам дотроо өрнөж буй улс төрд битүү хатуугаар тодорхой халулт өгөв. Тэрбээр “Ерөнхий сайд бид хоёр албан тушаалын төлөө нэг нэгнээ түлхэх унагадаг үеийн төлөөлөл биш. Ардын нам бол эв нэгдэлтэй нам. Намын дарга бид хоёрт эрх мэдлийн төлөө тэмцэлдэх ямар ч шалтгаан байхгүй” гэх агуулгатай тайлбарыг албаар өгөх нь тэр.

Энэ үгээрээ Д.Амарбаясгалан ирэх сарын 6-нд болох намын хурлын үеэр ерөнхий нарийн бичгийн даргад санаархаж буй Я.Содбаатарт ямар боломж байхгүй шүү гэдгийг л шулуухан хэллээ гэж харж болохоор байна. Тэрбээр, нэгдүгээрт эв нэгдэл сайн байгаагаа илэрхийлэв. Эв нэгдэл гэдэг бол Ерөнхий сайд, ЗГХЭГ-ын дарга хоёр нэг талдаа байгаа шүү гэдэг сануулга. Хоёрдугаарт, улс төрийн үе хоорондын асуудлыг онцлов. Л.Оюун-Эрдэнэ, Д.Амарбаясгалан хоёр бол Ардын нам дахь 80-аад оны төлөөллүүд. Тиймээс У.Хүрэлсүх тэргүүтэй 70-аад оны ах нарыг нам доторх улс төрийн эрх мэдэлд одооноос шунаад хэрэггүй, үе үеэрээ энэ намыг удирдацгаая гэх агуулгатай мессежийг өглөө. Энэ бол Хэрэг эрхлэхийн даргын хэлсэн хамгийн чухал улс төрийн мессеж байв.

Хөгжилтэй нь, энэ хоёрыг зөрчилдсөн мэтээр хорлож байгаа нөхдүүдээр хөөрхий АН-ын хэдийг цоллож байгаад нульж орхив. Үнэндээ МАН-ыг байтугай өөрсдийгөө яая гэж АН-ынхан ийм дэмий балай юм хийгээд ямар ч шаардлагагүй. Дээрээс нь МАН-аас бүх асуудал нь хараат болчихоод байхад дарга нарыг нь хагалах ажлыг арай ядан намаа босгох гэж байгаа С.Баярцогт тэргүүтэй нөхдүүд яг энэ цаг үед хийхгүй. Аль болох Ардын намынхныг тойглож байгаад эрх мэдлээ авахыг л бодох биз.

Тиймээс ЗГХЭГ-ын дарга Д.Амарбаясгалангийн энэ гэнэтийн улс төрийн тайлбар АН руу биш дотоод руугаа. Бүр нарийвчилбал, Ерөнхийлөгчийн институтэд байгаа хэсэг нөхдүүдэд чиглэсэн гэж харж болохоор байна.

Г.Лхагвадорж