УИХ-ын чуулганы үдээс хойшх хуралдаанаар Гаалийн албан татвараас чөлөөлөх тухай хууль хүчингүй болсонд тооцох тухай хуулийн төслийн эцсийн хэлэлцүүлгийг хийлээ.

Улмаар хуулийн төслийг эцэслэн батлах санал хураалтыг явуулах гэсэн боловч чуулганы танхим дахь гишүүдийн ирц хангалтгүй байсан тул УИХ-ын дарга Д.Амарбаясгалан санал хураалтыг ирэх 7 хоногийн чуулганы хуралдаан хүртэл хойшлуулж буйг мэдэгдлээ.

Сануулахад, өнгөрсөн онд гурилын үнийн өсөлтийг бууруулах зорилгоор импортоор орж ирэх гурил, тэжээлийг гаалийн албан татвараас чөлөөлсөн байдаг. Харин салбар яамнаас дээрх хуулийн төсөл нь үр дүнгээ өгсөн. Гэхдээ үүнээс цааш үргэлжилбэл тариалангийн салбарын нөхцөл байдал хүндэрнэ гэж мэдэгдсэн. Улмаар ХХААХҮ-ийн сайд Ж.Энхбаяр Гаалийн албан татвараас чөлөөлөх тухай хууль хүчингүй болсонд тооцох тухай хуулийн төслийг УИХ-д өргөн мэдүүлсэн юм.