Ардчилсан намаас Ерөнхий сайд Л.Оюун-Эрдэнэд албан шаардлага хүргүүлж буй талаараа өнөөдөр /2022.10.17/ мэдээлэл хийлээ. Тэдний зүгээс хүргүүлж буй шаардлагыг нийслэлийн АН-ын дэд дарга А.Цэрэнбат уншиж танилцууллаа. Тэрбээр "Улс орны эдийн засаг доройтож, өдрөөс өдөрт уруудаж, хүний эрх, эрх чөлөө зөрчигдөж вальютын ханш өргөн хэрэглээний барааны үнэ нэмэгдэж, ААН-үүд үй олноороо хаалгаа барьж байгаад АН төдийгүй нийт иргэд санаа зовж байна. АН ҮБХ-ны намрын анхны хуралдаанаар МУ-ын Засгийн газраас боловсруулсан 2023 оны төсвийн төслийг хэлэлцэж санал гаргалаа. 2023 оны төсвийн төсөл нь МАН-ын зүгээс 2024 оны сонгуульд бэлтгэсэн, төрийн эрх мэдлийг хууль бусаар авахад чиглэсэн луйврын төсөл болсон гэж ҮБХ-ны нийт гишүүд санал нэгтэйгээр дүгнэсэн. Төсвийн төслийг дахин хянан боловсруулж өргөн барихыг шаардаж байна" гэлээ.

Иймд тэдний зүгээс дараах шаардлагуудыг хүргүүлж буй аж. Үүнд:

-Нэгдсэн төсвийн 19.6 их наядын бодитой бус нийт орлого, татварын орлогыг нэмэгдүүлэхгүй байх, ард иргэдэд дарамт учруулахгүйгээр бодитой үндэслэл тооцоо хийх,

-Төсвийн 1.5 их наядын алдагдлыг арилгаж, төсвийг тэнцвэржүүлэх

-Төсвийн хөрөнгө оруулалт, худалдан авалтаас авилга хээл хахууль авах боломжийг арилгах, хөрөнгө оруулалтыг хэсэгчлэн болон бүрэн хэмжээгээр царцаах, хэмнэгдсэн зардлыг цалин, тэтгэвэр нэмэх, гадаад өр барагдуулах чиглэлд тусгах

-Өргөн хэрэглээний бараа бүтээгдэхүүний үнийн өсөлтийг бууруулах

-Шаталсан татварын хэмжээг нэмэгдүүлэхийг зогсоох

-Ипотекийн зээлийн асуудлыг хуулийн хүрээнд шийдвэрлэх

-Төрийн үйлчилгээний алба хаагчдын цалин, ахмадын тэтгэврийн хэмжээг нэмэгдүүлэх

-Хүүхдийн мөнгийг ялгаварлалгүй олгох

-Дараах албан тушаалтнуудад хариуцлага тооцох. Үүнд: УИХ-ын гишүүн Г.Занданшатар, ЗГХЭГ-ын дарга Д.Амарбаясгалан, Сангийн сайд Б.Жавхлан, ХХААХҮ-ийн сайд Х.Болорчулуун, Монголбанкны Ерөнхийлөгч Б.Лхагвасүрэн, ЦЕГ-ын Ж.Болд нарыг нэн даруй огцруулахыг шаардлаа.

Шаардлагын хариуг биелүүлээгүй тохиолдолд эсэргүүцлийн жагсаал зохион байгуулах, бүх нийтийн ажил хаялтад уриалах зэрэг шат дараатай арга хэмжээ авна гэдгийг анхааруулж байна гэлээ.