Засгийн газрын гишүүн, Соёлын сайд Ч.Номин болон Соёлын дэд сайд М.Батбаяр нар өчигдөр буюу наймдугаар сарын 16-нд “Чингис хаан” хаад язгууртны музейд ажиллаж, үзмэр таталт, үзүүллэг дэглэлттэй танилцаж, зарим асуудлыг шийдвэрлэлээ.

“Чингис хаан” хаад язгууртны музей нь өнөөдрийн байдлаар төрийн болон орон нутгийн өмчит байгууллага, бусад улс орны музей зэрэг 40 орчим газраас үзмэр таталт хийж, 12 мянга орчим үзмэр татаж, үзүүллэг дэглэлтээ дуусгаж байна.

Мөн БНСУ-ын Үндэсний музейгээс мэргэжилтнүүд ирж, музейн шилэн хорго /витрин/ суурилуулах ажилд мэргэжил арга зүйн зөвлөгөө өгч, хамтран ажиллаж байгаа юм.

Музейн танхимуудын үзүүллэг дэглэлт дуусаж, үзмэр хадгалалт, номын сан, эрдэм шинжилгээний хэсгүүдийн ажил дууссан тул ирэх сарын 15-н гэхэд музейг нээхээр төлөвлөж байна.

Соёлын сайд Ч.Номин "Чингис хаан” хаад язгууртны музей бол соёлын салбарт хийгдэж байгаа томоохон бүтээн байгуулалтын нэг. Азидаа том хэмжээний музейд багтаж байна. Энэ сарын эхээр бид Ерөнхийлөгчийн ивээл дор “Чингис хааны ертөнц ба Монгол судлал” сэдэвт олон улсын цогц арга хэмжээг зохион байгуулсан.

Хуралд ирсэн олон улсын судлаачид “Чингис хаан” хаад язгууртны музейд ажиллах үеэрээ музейн үзмэр, эд өлгийн зүйлсийг маш ховор, үнэтэй үзмэрүүдтэй болж гэж дүгнэсэн. Мөн музей олон улсын стандартад бүрэн нийцэж байгаа.

Музей Хүннү гүрнээс эхлээд Богд хаант улс хүртэлх Монгол Улсын түүхийг бүхэлд нь харуулахаас гадна Монголчууд бидний дэлхийн түүхэнд оруулсан хувь нэмрийг тодотгон харуулах үнэт үзмэр, эд өлгийн зүйлсийг дэлгэн харуулна. Музей өөрөө хадгалах, судлах, харилцаа холбоо үүсгэх, боловсрол олгох гэсэн үндсэн дөрвөн үүрэгтэй байдаг.

Эх сурвалж: Соёлын яам