“Айчи-Нагоя 2026” Азийн наадмын эмэгтэйчүүдийн сагсан бөмбөгийн тэмцээнд өрсөлдөж буй Монголын шигшээ баг өчигдөр хэсгийн сүүлийн тоглолтоо Малайзын шигшээ багийн эсрэг хийж, 89:81-ийн харьцаатай ялалт байгууллаа.

Ингэснээр Монголын шигшээ баг хэсгийн шатанд нэг хожил, хоёр хожигдолтой болж, хэсгээсээ гуравдугаар байраар шалгарч хасагдах шатанд өрсөлдөх эрхтэй болсон билээ.

Малайзын багтай хийсэн тоглолтын турш Монголын шигшээ баг онооны зөрүүг хадгалж, шийдвэрлэх мөчүүдэд довтолгоогоо үр дүнтэй гүйцэтгэснээр чухал ялалтыг байгуулсан юм. Тус тоглолтод О.Хулан 31 оноо авч багаа тэргүүлсэн бол Амари Робинсон 27, Б.Ариунцэцэг 16 оноо тус тус авч багаа хожилд хөтлөжээ.

Тэдний дараагийн өрсөлдөгч нь Азийн сагсан бөмбөгийн хүчирхэг багуудын нэг болох БНХАУ-ын шигшээ баг аж.

Хоёр багийн тоглолт энэ сарын 24-ний өдөр 13:00 цагт эхлэхээр товлогджээ.

Ийнхүү Монголын эмэгтэй шигшээ баг хэсгийн шатны сүүлийн тоглолтод Малайзыг хожиж, тэмцээний медалийн төлөөх өрсөлдөөнөө үргэлжлүүлэх боломжтой боллоо. Одоо тэднийг Азийн сагсан бөмбөгийн томоохон багуудын нэг болох Хятадын шигшээ багтай хийх шөвгийн наймын чухал тоглолт хүлээж байна.