Дархан-Уул аймгийн 12 дугаар сургуулийн захирал нөхрөө сургуульдаа ажилд авч, улмаар нөхөр нь сурагчийн биед халдаж зодсон талаар тус сургуулийн сэтгэл зүйч М.Болорцэцэг мэдээлэл хийсэн. Энэ үеэр тэрбээр сургуулийнх нь захирлын нөхөр гуравдугаар сарын 9-ний өдөр хичээлийн цагаар сурагчид бие махбодийн хүчирхийлэл үзүүлсэн талаар мэдээлэл өгсөн юм. Түүний хувьд сургуулийн орчинд үйлдэгдэж буй бие махбодын хүчирхийллийг эсэргүүцэж, үсээ хуслаа.

Тэрбээр энэ талаараа "Хэлж яриад ямар ч нэмэргүй байгаа. Тиймээс өөр арга байсангүй. Байгууллагууд шалгаж байгаа л гэж байна. Гэхдээ төрийн ажил бичиг цаасаар дамжигдаж явсаар энэ мэт байдлаар замхардаг. Тиймээс би хүүхдүүдийнхээ эрхийг хамгаалах, тэднийхээ сэтгэлзүйг төлөвшүүлэх, бие махбодын хүчирхийлэл сургуулийн орчинд байх ёсгүй хэмээн эсэргүүцэж энэхүү шийдэлд хүрсэн. БШУ-ны сайдын туслахаар дамжуулан хүсэлт тавьсан" гэв.