Түлхүүр мэдээлэл:

• Apple компани эмнэлгийн ажилтнуудад зориулан нүүрний хамгаалалт үйлдвэрлэхээр болжээ.
• Долоо хоногт 1 сая гаруй нүүрний хамгаалалт үйлдвэрлэхээр төлөвлөөд байгаа аж.
• Уг үйл ажиллагаанд загвар зохион бүтээгч, инженер, нийлүүлэгчдээ дайчлах юм байна.

“Apple” компанийн гүйцэтгэх захирал Тим Кук өөрийн твиттер хуудаснаа "Манай компани эмнэлгийн ажилтнуудад зориулан нүүрний хамгаалалт үйлдвэрлэхээр боллоо" хэмээн ярьсан бичлэгээ байршуулжээ. 

“Apple” компани долоо хоногт нэг сая гаруй нүүрний хамгаалалт үйлдвэрлэхээр төлөвлөж байгаа бөгөөд эдгээр бүтээгдэхүүнээ эхний ээлжинд АНУ-ын эмнэлгийн ажилтнуудад, дараа нь дэлхий даяар тараахаар төлөвлөсөн байна. Мөн тус компани халдвар тархахаас урьдчилан сэргийлэх үүднээс 20 сая амны хаалтыг дэлхий даяар хандивлаж байгаа аж.

Одоогоор нүүрний хамгаалалтыг бүтээх, үйлдвэрлэх, нийлүүлэх үйл ажиллагаанд загвар зохион бүтээгчид, инженерүүд, нийлүүлэгчдээ татан оролцуулж эхэлсэн байна. Харин бүтээгдэхүүний үйлдвэрлэлд шаардлагатай материалыг өөрийн улс болон БНХАУ-аас авч байгаа юм байна.

Эх сурвалж:CNBC