Түлхүүр мэдээлэл:

• Фейсбүүк компанийн ажилтанд коронавирусын халдвар илэрчээ.
• Фейсбүүк компани гуравдугаар сарын 13-ныг хүртэл гэрээсээ ажиллах чиглэлийг ажилтнууддаа өглөө.

Өчигдөр буюу баасан гаригт Фейсбүүк компанийн ажилтанд коронавирусын халдвар илэрсний улмаас тус компани Сингапур, Лондон дахь салбаруудаа хааснаа зарлажээ.

Тодруулбал, Сингапур дахь салбарын ажилтнаас өчигдөр Covid-19 вирусийн халдвар илэрсэн байна.

“Бид халдвар илэрсэн газрыг даруй хааж, цэвэрлэгээ ариутгалын ажил эхлүүлсэн бөгөөд гуравдугаар сарын 13-ныг хүртэл гэрээсээ ажиллах чиглэлийг ажилтнууддаа өглөө” гэж Фэйсбүүк компанийн мэдэгдэлд өгүүлжээ.

Халдвар авсан ажилтан нь хоёрдугаар сарын 24-нөөс 26-ны хооронд тус компанийн Лондон хот дахь салбарт зочилж байсан ажээ.

Тиймээс Лондон хотын оффисыг Даваа гараг хүртэл бүрэн хааж, ариутгалын арга хэмжээ авахаар болсон байна.

Фэйсбүүк компани Шанхайн салбар оффисоо тодорхойгүй хугацаагаар хаагаад байгаа. Мөн Итали, Өмнөд Солонгосын салбарынхаа ажилтнуудад гэрээсээ ажиллах зөвлөмж хүргэсэн байна.

Сүүлийн үед АНУ дахь нөхцөл байдал муудаж эхэлсэн тул Сан Франциско хотын оффистоо мөн Баасан гарагаас эхлэн гэрээс ажиллах арга хэрэгжүүлж эхэлжээ.

Эх сурвалж: AFP