Улаанбаатар-Дарханы чиглэлийн зам засвар, шинэчлэлийн ажил ирэх даваа гарагаас эхэлнэ. Үүнтэй холбогдуулан ЗТХЯ-ны автозамын мэргэжилтнүүд, сайдын зөвлөхөөс бүрдсэн ажлын хэсгийн баг өчигдөр газар дээр нь очиж замын бүтээн байгуулалт хийх газруудыг чөлөөлсөн байдалтай танилцлаа. Одоогийн байдлаар замын газар чөлөөлөлт 100 хувь хийгдэн 4 урсгалтай автозам барих бүх боломж бүрджээ. Энэ талын бүрэн мэдээлэл болон зам засварын ажлын талаар удахгүй танилцуулна гэж ЗТХЯ-наас мэдээллээ. 

Тодруулбал, Улаанбаатар-Дархан чиглэлийн 204.11 км хатуу хучилттай  авто замыг АХБ-ны 83 сая ам.долларын санхүүжилтээр засварласан бол уг замыг 4 эгнээ болгох ажлыг Европын Сэргээн босголтын хөгжлийн банкны /ЕСБХБ/ 120 сая ам.долларын санхүүжилтээр хийх юм. Энэ ажлын тендэрийг ЕСБХБ-аас өнгөрсөн оны 10 дугаар сарын сүүлээр зарлаж, энд БНХАУ-ын дөрөв, дотоодын нэг  компани шалгарчээ. Дарханы замыг 4 эгнээ болгох эхний ээлжийн 5 компани энэ оны эхээр  Монголд ирж, барилгын материалаа бэлдэх, кэмп байгуулах, геодезийн хэмжилтүүд хийх, материалын орд газрыг нээх зэрэг бэлтгэл ажлыг ханган талбай дээр гараад байна.