Аж үйлдвэр эрдэс баялгийн сайд Г.Дамдинням өнгөрсөн даваа гарагт шатахуун импортлогчидтой уулзаж дөрвөн хоногийн дотор шатахуун хангалт, түгээлтийг хэвийн болгох албан даалгавар өгсөн. Ялангуяа орон нутгийн шатахууны хэрэглээг гуравдагч этгээдээр дамжуулахгүйгээр хангахыг үүрэг болгосон юм.

Энэ талаар УИХ-ын чуулганы хуралдаанаар Стратегийн ач холбогдол бүхий бүтээгдээхүүний хангамж, нийлүүлэлтийг дэмжих тухай хуулийн төслийг хэлэлцэх үеэр сайд Г.Дамдинням "Өчигдрөөс эхлэн бүх суманд шатахуун нийлүүлсэн байна" гэсэн. Мөн шатахууны нөөц хангалттай атал нийлүүлэлт, түгээлт доголдсон асуудалд “Дизель түлшний тухайд бөөний худалдаа руу аж ахуйн нэгжүүд түлхүү анхаарч, жижиглэнгийн худалдаа руу бага анхаарсан нөхцөл байдал үүссэн” гэсэн юм.

Манай улсын хувьд өнөөдрийн байдлаар АИ-92 автобензин болон дизель түлшний 10 хоногийн нөөцтэй байгаа бөгөөд импорт хэвийн байгааг мөн яриандаа онцлов.

Тэрбээр “ОХУ-аас бидэнд амласан ёсоороо шатахуун хангалттай нийлүүлж байна. Импорт эрчимжиж байгаа” гэлээ.