Тэргүүн шадар сайд бөгөөд ЭЗХ-ийн сайд Н.Учрал УИХ-ын даргаар томилогдсон тул түүний оронд ХХААХҮ-ийн сайд Ж.Энхбаярыг шилжүүлэн томилж, УИХ-ын гишүүн М.Бадамсүрэнг ХХААХҮ-ийн сайдаар томилохоор МАН-ын бүлэгт танилцуулсан билээ.
Энэ дагуу өнөөдөр УИХ-ын чуулганы хуралдаанд дээрх саналыг танилцуулж, УИХ-ын гишүүд шинэ сайд нараас асуулт асууж, хариулт авлаа. Энэ үеэр УИХ-ын гишүүн С.Цэнгүүн "Ж.Энхбаяр сайд нь ХХААХҮЯ-аа Дарханд л байвал хөгжинө гээд, шинэ сайд нь Улаанбаатар руу нүүлгэнэ гээд. Ийм тоглоомтой байж болох юм уу" гэв. Түүний асуултад ХХААХҮ-ийн сайд асан Ж.Энхбаяр "Би гаргасан шийдвэрээ зөв гэж боддог. Цаашид ч Дархандаа байх ёстой" гэлээ. Мөн Ерөнхий сайд Г.Занданшатар "Та нар хаашаа нүү гэнэ, тийшээ л нүүнэ шүү дээ" гэлээ.
