Ерөнхий сайд Л.Оюун-Эрдэнийг огцрохыг шаардаж буй "Огцрох амархан" жагсаалын төлөөлөлтэй УИХ-ын дарга Д.Амарбаясгалан өнөөдөр 16:30 цагт уулзахаар болжээ. Учир нь жагсагчид УИХ-ын дарга Д.Амарбаясгаланд тодорхой асуудлын хүрээнд 24 цагийн дотор уулзах шаардлагыг хүргүүлсэн байдаг. Тиймээс УИХ-ын дарга Д.Амарбаясгалан жагсагчдын төлөөллийг хүлээн авч уулзах болсноо зохион байгуулагчдад мэдэгдсэн нь энэ аж.

Жагсагчдын зүгээс УИХ-ын дарга Д.Амарбаясгаланд дараах асуудлуудыг уламжилжээ. Тодруулбал,

• Улсын Их Хурал нь Засгийн газарт хяналт тавих бүрэн эрхтэй институт болохын хувьд хяналтын механизмаа ажиллуулах
• Иргэдийн дунд уур бухимдал үүсгээд буй асуудал нь хамтарсан Засгийн газрын асуудал бус Л.Оюун-Эрдэнэ хэмээх албан тушаалтны өөрийн хариуцлага хүлээх асуудал тул үүнийг засаглалын институт хоорондын асуудал болгож өргөжүүлэлгүй, тус албан тушаалтны өөрийнх нь хариуцлагын хүрээнд шалгах, хариуцлага тооцох
• УИХ-д Итгэл хүлээлгэх тогтоолын төсөл боловсруулахдаа хамтарсан Засгийн газарт холбогдуулан томьёолсон нь асуудлыг Ерөнхий Сайд Л.Оюун-Эрдэнээс булзааруулсан шинжтэй байгааг анхаарч УИХ-ын дарга албан ёсны байр сууриа иргэдэд нээлттэй илэрхийлэх гэх шаардлагуудыг тавиад байгаа аж.