Грект коронавирусийн халдварын улмаас эмнэлгийн ачаалал нэмэгдэж байгаатай холбогдуулан орон даяар шөнийн цагаар хөл хорио тогтоох болжээ. 

Грект лхагва гарагт халдварын 2752 тохиолдол шинээр илэрч, 43 хүн нас барсан аж. Ингэснээр тус улсад халдвар авсан хүний тоо 63321-д, нас барсан хүний тоо 909-д хүрсэн байна.

"Энэ сарын 13-наас 21:00 цагаас 05:00 цагийн хооронд хөл хорих цаг тогтооно" гэж Грекийн Иргэний хамгааллын дэд сайд Никос Хардалиас мэдэгджээ. Энэхүү арга хэмжээний дагуу хүндэтгэн үзэх шалтгаантайгаас бусад тохиолдолд гэрээс гарахыг хориглоно.

Грект халдварын тархалтыг хяналтад авахын тулд өнгөрсөн пүрэв гаргаас гурван долоо хоногийн хугацаанд хөл хорио тогтоосон юм. Энэ онд хоёр дахь удаагаа тогтоож буй хөл хорионы үеэр ахлах сургуулиудыг хааж, супермаркет, эмийн сангаас бусад жижиглэн худалдааны бизнесийн үйл ажиллагааг зогсоожээ.