Баян-Өлгий аймаг дахь Цагдаагийн газар энэ оны 10 сарын байдлаар Алтайн сонгиныг хууль бусаар их хэмжээгээр түүн бэлтгэж, худалдан борлуулах зорилгоор тээвэрлэж явсан 2 удаагийн үйлдлийг илрүүлэн шалгаж байна.

Алтайн сонгино нь хад асгатай өндөр ууланд ургадаг, хүйтэнд гойд тэсвэртэй, ааг амт сайтай, фитонцид ихээр агуулдаг, хүнсний төдийгүй эмчилгээний чухал ач холбогдолтой ургамал юм. Монгол Улсын Засгийн газрын 1995 оны 153 дугаар тогтоолоор Алтайн сонгиныг ховор ургамлын жагсаалтад оруулжээ.

Байгалын ургамлын тухай хуулиар иргэн ховор ургамлыг хүнсний болон ахуйн зориулалтаар, зохих зөвшөөрлийн дагуу 5 кг-аас дээшгүй хэмжээгээр түүж хэрэглэхээр заасан байдаг. Гэвч ч сүүлийн жилүүдэд иргэд худалдан борлуулах, ашиг олох зорилгоор их хэмжээгээр түүж, бэлтгэсний улмаас байгаль дахь нөөц хомстож байгааг мэргэжлийн байгууллагууд тодорхойлсон байна.

Иймд тухайн ургамлыг хууль бусаар түүж бэлтгэсэн тохиолдолд Эрүүгийн хуульд 5.4-7 сая хүртэлх төгрөгөөр торгох, эсхүл нэг жилээс таван жил хүртэл хугацаагаар хорих ял шийтгэхээр заасан тул хууль, тогтоомжид заасан хэмжээнд, зохих зөвшөөрлийн дагуу түүж хэрэглэхийг Цагдаагийн байгууллагаас ард иргэдэд анхааруулж байна.