Ямааны годрон өвчний нөхөн төлбөрт 2,8 тэрбум төгрөг олгохоор шийдвэрлэжээ. Тодруулбал, Дорноговь аймгийн Хатанбулаг, Хөвсгөл сумдад 2024 оны долоо, наймдугаар сард ямааны годрон өвчин гарсныг лабораторийн шинжилгээгээр баталгаажуулсан. Энэ хүрээнд ямааны годрон өвчний халдварын голомтыг устгах зайлшгүй шаардлага бий болсон.

Иймд малын гоц халдварт өвчин оношлогдсон малчин өрхүүдийн мал хашаа хороо, хэвтэр бууцыг халваргүйтгэх, учирж болзошгүй эрсдэлээс сэргийлэх, малын халдварт өвчний тархалтыг зогсоох зорилгоор аймгийн Мал эмнэлгийн газрын даргын тушаал болон халдварт өвчний үед ажиллах ажлын удирдамжийн дагуу малын өвчин гарсан өрхүүдийн хашаа, хэвтэр бууц, малын угаалган халдваргүйжүүлэлтэд хамруулсан юм. Ингэхдээ нийт 91 малчин, мал бүхий иргэний зориудаар устгасан 14.252 ямааны нөхөн төлбөрт шаардагдах 2 тэрбум 820 сая 590 мянган төгрөгийг Засгийн газрын нөөц сангаас гаргахаар болжээ.