“The Hu” хамтлаг Монголд анх удаа бүрэн хэмжээний тоглолтоо хийх боллоо

Ангилал
Нийгэм
Огноо
Унших
4 минут 6 секунд

"Хүннү рок" урсгалыг үндэслэгч, Монгол үндэстний хөгжмийг рок дуугаралттай хослуулан Дэлхий дахинаа өөрийн өнгө төрхийг тодорхойлж буй "Чингис хаан" одонт "THE HU” хамтлаг Монголын Үндэсний их баяр наадмаар анхны бүрэн хэмжээний тоглолтоо эх орондоо толилуулах гэж байна.

Тэднийг Их Британийн алдарт The Guardian сэтгүүлд "Дэлхийн хөгжмийн ертөнц дэх шинэ үзэгдэл" хэмээн тодорхойлсон байдаг. Дэлхий дахины, тэр дундаа европын орны хөгжим сонирхогчдын ой тойнд багтамгүй аялгуугаараа өөрсдийн өв соёлоо таниулж байгаа тэд тоглолтоо ирэх сарын 10-ны өдөр Улаанбаатар хотын "Hit Park"-д хийхээр товлосон байна.

Хамтлаг байгуулагдснаас хойш анх удаа ийнхүү эх орондоо бүрэн хэмжээний тоглолтоо толилуулах гэж буй тэдний тоглолтыг ойрын 5-6 жилдээ эх орондоо үзэх боломжгүй л болов уу.

Энэхүү тоглолтын Ерөнхий продюсероор Халзаа буюу М.Даваасүрэн ажиллах бол Ерөнхий найруулагчаар SKIN entertainment-ийн найруулагч Б.Анар ажиллахаар болжээ. Монголд урьд өмнө нь байгаагүй шинэлэг шийдэл, тайз засал бүхий тоглолтуудыг зохион байгуулсаар буй тэд энэ удаад ч мөн "The Hu" хамтлагийн онцлогийг харуулсан тоглолт зохион байгуулна гэдгээ онцолжээ.

Монгол уран бүтээлчдээс анх удаа Их Британийн ТОП 100 дууны жагсаалтад багтаж, "Оддын дайн" уран зөгнөлт киноны видео тоглоомд дуу нь сонгогдож, Америкийн "Биллбоард"-ын жагсаалтыг "Гэрэг" цомгоороо тэргүүлсэн зэрэг олон олон амжилтын эзэн болсон тэдний дэлхий таалсан уран бүтээлүүдийг дэргэдээс нь сонсох алтан боломж тун удахгүй ийн тохиох гэж байна.

"The Hu" хамтлагийг 2016 онд МУГЖ дуучин Б.Дашдондог үүсгэн байгуулсан ба Монгол үндэстний хөгжмийг рок дуугаралттай хослуулсан Монгол рок буюу Хүннү рок урсгалаар тоглодгоороо онцлог. Хамтлаг үндсэн дөрвөн гишүүнтэйгээр 2018 оны есдүгээр сард "Юу вэ, юу вэ, юу” дуугаар дебютээ хийсэн бөгөөд тус дуу юүтүб хуудаснаа 122 сая хандалт авчээ.

Уг дуугаараа дэлхийн рок хөгжмийн урсгалд шинэ салхи авчирсан тэд үргэлжлүүлэн "Wolf Totem", "Shoog shoog" зэрэг дуунуудаа гаргаж, 2019 онд "Gereg" хэмээх цомгоо худалдаанд гаргажээ. Энэхүү цомог худалдаанд гарсан даруйдаа Billboard-ийн World albums төрөлд 1-р байрт жагссан байдаг.

Монголын уран бүтээлчид эх хэл дээрээ гаргасан уран бүтээлээрээ дэлхий дахины анхаарлыг татна гэдэг ердөө мөрөөдөл төдий байсан цаг саяхан. Харин "The Hu" хамтлаг энэхүү мөрөөдлийг бодит болгож дэлхийд томоохонд тооцогддог “Coachella”, “Hellfest” зэрэг хөгжмийн фестивалиудын тайзнаа тоглож, өнгөрсөн хугацаанд хоёр цомог, дөрвөн сингл цомог гаргаж, Америк, Европ, Австрали, Ази тивд нийт 270 гаруй тоглолт хийжээ.

Тэдний тухай домогт дуучин Элтон ЖонБи рок хөгжмийн хөгжлийг нэг шат ахиулсан учраас Хатан хаанаас баатар хэргэм хүртсэн. Харин надаас хойш рокыг дахин нэг шат ахиулсан хамтлаг бол “The HU” шүү. Тийм ч учраас би танай хөгжмийг сонсдог, хүндэлдэг хэмээж байсан гэдэг. Энэ нь тэднийг дэлхий даяар хэрхэн алдаршиж буйг илтгэх томоохон нотолгоо биз ээ.

Тасалбарыг ticket.mn-ээс худалдан авах боломжтой

Ерөнхий сайд Л.Оюун-Эрдэнийн тэргүүлсэн Засгийн газар зоригтой, хурдтай, сайн ажиллаж байгаа учир бодлогоо үргэлжлүүлэх ёстой
Ерөнхий сайд Л.Оюун-Эрдэнийн тэргүүлсэн Засгийн газар зоригтой, хурдтай, сайн ажиллаж байгаа учир бодлогоо үргэлжлүүлэх ёстой
 
Булганд “Алтаргана-2024” болно
Булганд “Алтаргана-2024” болно
АНХААРУУЛГА: Уншигчдын бичсэн сэтгэгдэлд UBN.MN хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй. !
UBN.mn сайтын редакц