УДЭТ залуу халаагаа бэлдэж, шинэ залуу мэргэжлийн өндөр ур чадвартай уран бүтээлчдийг сонгон шалгаруулах энэ оны ээлжит элсэлтээ зохион байгууллаа.

“Театр студид” жүжигчин сонгон шалгаруулах элсэлтийн журам, болзлыг хангасан 22 жүжигчнийг бүртгэж, мэргэжлийн жүжигчин сонгон шалгаруулах үйл ажиллагааг 2020 оны 8 сарын 21-22 ний өдрүүдэд зохион байгууллаа.

Шалгаруулалтыг хувь уран бүтээлчийн CV материалтай урьдчилан танилцаж, жүжиглэх ур чадварын онол, театрын түүх, ёс зүй, гоо зүйн мэдлэгээр бичвэрийн шалгалтыг тестээр авч, харагдах байдал, гадаад гоо сайхан, өөрийгөө илэрхийлэх ур чадвар, хувийн бэлтгэлийг харгалзан дуу, бүжиг, хувийн номер, монолог, жүжгийн хэсэг, хошин үзүүлбэр гэсэн төрлүүдээр явуулжээ.

Шалгаруулалтын 1-р шатанд  гадаад дотоодын мэргэжлийн их дээд сургууль дүүргэсэн 22 жүжигчин оролцож 50 хувь нь 2-р шатанд  тунан үлдэж, Ганболдын Номин-Эрдэнэ, Түвшинсахйны Анхзул, Идэржавхлангийн Дашнямжил, Батбаярын Ганзориг, Цогтоогийн Рагчаа, Цэрэндолгорын Анхбаяр нар Театр-Студи ангийн шалгаруулалтад тэнцжээ.