Нийслэлийн Налайх дүүргийн 6 дугаар хороо, “Тэнгэрийн энерги бясалгалын төв” орчмоос Хан-Уул дүүргийн харьяат, иргэн О сураггүй болсон дуудлагыг 2020 оны долдугаар сарын 31-ний өдрийн 22:35 цагт ОБЕГ хүлээн авчээ. Налайх дүүргийн Онцгой байдлын хэлтсийн Гал түймэр унтраах, аврах 28 дугаар анги, тус дүүргийн Цагдаагийн хэлтсийн алба хаагчид, ар гэрийнхэн наймдугаар сарын 1-ний өдрийн 14:40 цагаас эхлэн эрэн хайх ажиллагааг явуулж байна.
ОБЕГ-аас өгч буй хамгийн сүүлийн мэдээллээр тус дүүргийн Онцгой байдлын хэлтсийн Гал түймэр унтраах, аврах 28 дугаар ангийн алба хаагчид, ар гэрийнхний хамт 2020 оны наймдугаар сарын 13-ны өдөр 09:00-21:00 цагт “Тэнгэрийн энерги” бясалгалын төвөөс “Тэнгэрийн элч” амралтын газар, “Мянган ламын агуй”, “Баянцагааны даваа” гэдэг газар хүртэл 28 км-т явган болон автомашинтай, “Тэрэлжийн шинэ гүүр” гэдэг газраас “Баянзүрх хайрхан”-ы ар болон өвөр талаар “Туул” голоор 6 км-т завьтай эрэн хайх ажиллагааг зохион байгуулсан боловч үр дүнд хүрээгүй тул түр зогсоожээ.
Эрэн хайх ажиллагааг наймдугаар сарын 14-ний өдрийн 09:00 цагт дахин эхлүүлсэн байна. Тус эрэн хайх ажиллагаа 14 дэх өдөртөө үргэлжилж буй аж.