Замын хөдөлгөөний удирдлагын төвөөс хичээлийн шинэ жил эхлэх гэж буйтай холбогдуулан мэдээлэл хийсэн. Энэ үеэр Нийслэлийн Засаг даргын хэвлэлийн төлөөлөгч Н.Сугар нийтийн тээврийн хэрэгслийг дахин гурван байршилд нэгдүгээр эгнээгээр зорчуулах зохицуулалт хийхээр судалж байгаа талаараа мэдээлсэн юм. Тодруулбал,

"Автобусны нэгдүгээр эгнээгээр зорчдог өргөн чөлөөг дахин гурваар нэмэгдүүлэх ажлыг зохион байгуулахаар төлөвлөн ажиллаж байна. Одоогоор Энхтайваны өргөн чөлөөгөөр автобус чөлөөтэй явж байгаа.

Үүн дээр нэмээд Нисэхээс Энхтайваны гүүр хүртэл, Саппорогийн тойргоос хойгуураа хороолол, Баянбүрд, Шархад хүртэл мөн 7 буудлаас урагш Дөрвөн зам хүртэл замыг чөлөөлөх ажлыг төлөвлөөд явж байна" гэж мэдээллээ.