ЭМЯ-наас Ковид-19-тэй холбоотой цаг үеийн асуудлаар ээлжит мэдээлэл хийлээ. Энэ үеэр тус яамны хэлтсийн дарга Д.Нарангэрэл АНУ болон ОХУ дахь Ковид-19 халдварын нөхцөл байдлын талаар мэдээлэл өгсөн юм. Тэрээр:

“АНУ-д жагсаал, цуглаантай холбоотойгоор 50 мужийн 28-д нь Ковид-19 дахин нэмж бүртгэгдсэн байна. Ингээд Америкийн Өвчний хяналт, сэргийлэлтийн төвөөс мэдээлэхдээ Ковид-19-ийн батлагдсан тохиолдлын тоо нь бодит байдал дээр илүү өндөр байх магадлалтайг анхааруулж байна.

Манай хөрш ОХУ-ын хувьд 24 цагийн дотор 8595 хүн Ковид-19-өөр шинээр халдвар авсан байна. Ялангуяа Буриад, Тува, Читад өвчлөл өмнөх өдрийнхөөс 44-87 хүнээр нэмэгдсэн байна. Эрхүү хотод хамгийн өндөр буюу өвчлөл 226 хүнээр нэмэгдэж, нийт өвчлөлийн тоо 3083 болж, 18 хүн нас барсан байна. Мөн Тувад өчигдөр 87 хүн шинээр өвчилж, нийт өвчлөлийн тоо 1835, нас баралт 4 болсон байна. Сүүлийн 14 хоногт Буриад, Тувад өвчлөл тасралтгүй нэмэгдэж байна” гэлээ.