УИХ-ын Хууль зүйн байнгын хорооны дарга Л.Мөнхбаатар болон Хууль зүйн бодлогын зөвлөх О.Номинчимэг нар Хууль зүйн туслалцааны тухай хууль болон бусад хуулийн нэмэлт өөрчлөлтийн талаар мэдээлэл хийлээ. Энэ үеэр Хууль зүйн бодлогын зөвлөх О.Номинчимэг "Хууль зүйн туслалцааны тухай хуулийн нэмэлт өөрчлөлтөөр дөрвөн талын субъект хууль эрх зүйн үйлчилгээг үнэ төлбөргүй авахаар болсон. Тухайлбал, тухайлсан гэмт хэргийн тэр дундаа хүн худалдаалах болон гэр бүлийн хүчирхийллийн гэмт хэргийн хохирогч болсон хүмүүс үнэ төлбөргүй өмгөөллийн үйлчилгээг авах эрхтэй болж буй юм.

Нийтлэг тавигдаж буй шаардлага нь төлбөрийн чадваргүй байх. Нийгмийн халамжийн мэдээллийн санд ядуурлын түвшнээс доод түвшин, халамж зайлшгүй шаардлагатай иргэнийг ийнхүү заасан байдаг. Бүртгэгдэж амжаагүй иргэд байдаг. Энэ төрлийн иргэд өөрийгөө ядуурлын шугамаас доогуур болохоор хорооны Засаг даргын тодорхойлолттой хамт өгч хууль зүйн туслалцааг авах боломжтой болно" гэлээ.