Түлхүүр мэдээлэл:

• Евро комиссоос Монгол, Зимбабэ зэрэг 11 улсыг Хар жагсаалтад оруулах саналаа ЕХ-ны гишүүн орнуудад илгээжээ.
• Хэрвээ гишүүн орнууд санал нэгдвэл ирэх аравдугаар сард хар жагсаалтад нэмэх аж.
• Хар жагсаалтад орсон улсын иргэд Европын улс орнуудад картаар үйлчлүүлэх эрхгүй болох зэрэг эрсдлүүд хүлээж байна.

Европын Холбооны гүйцэтгэх засаглалын дээд байгууллага болох Евро Комисс мөнгө угаалт, терроризмийн санхүүжилттэй тэмцэх шинэ байгууллага байгуулах төлөвлөгөө боловсруулж буй тухай Ройтерс агентлаг мягмар гарагт мэдээлсэн билээ. Уг саналд 11 улсыг хар жагсаалтад нэмж оруулах тухай тусгасан байсан ба тэдгээр улсын нэг нь манай улс байв.

Тэгвэл Евро Комиссын удирдлага энэхүү саналаа өчигдөр буюу Пүрэв гарагт Европын Холбооны гишүүн 27 улсын засгийн газарт илгээжээ. 

Саналд мөн Европын Холбооны хар жагсаалтад нэмж оруулах улсуудын нэрсийг илгээсэн байна. Тэдгээр улсууд нь Монгол, Багамын арлууд, Ботсвана, Камбож, Гана, Ямайк, Мавритус, Мьянмар, Никарагуа, Панам, Зимбабве байгаа юм.

Хэрвээ Европын Холбооны гишүүн улсууд санал нэгдвэл эдгээр орнуудыг ирэх аравдугаар сард хар жагсаалтад нэмэх юм байна.

Одоо хар жагсаалтад байгаа орнууд нь Афганистан, Ирак, Вануату, Пакистан, Сири, Йемен, Уганда, Тринидад ба Тобаго, Иран, Умард Солонгос юм.

Евро Комисс санхүүгийн гэмт хэрэгтэй хийх тэмцэлд ахиц дэвшил гаргасан Босни, Гайана, Лаос, Этиоп, Шри Ланка, Тунис улсуудыг өмнө нь хар жагсаалтаасаа хассан юм байна.