Памирын нурууны Ленин (7134м) оргилд соло авиралт хийж явсан "Цэгц" клубийн тэргүүн Х.Бумхишиг 5800 м өндөрт хөлөө хөлдөөсний улмаас бууж чадахгүй гацсан байдалтай байгаа талаар бид мэдээлсэн. Улмаар Монголын уулчдын Үндэсний холбооны Аврах ажиллагаа, эрсдэлийн удирдлага хариуцсан дэд ерөнхийлөгч С.Ганхүү, Жаргалант клубийн уулчин Э.Даваадоржийн хамтаар өчигдөр буюу 2022 оны есдүгээр сарын 8-ны өдөр Улаанбаатараас мордоод байна.

Тэд Оше хотод бэлтгэл ажлаа хийн, ажиллагаанд оролцох хоёр хүн олжээ. Яг энэ үеэр давхцаад Коржиневский оргилд явсан уулчид аврах тусламжийн дохио илгээсэн хэмээн Монголын уулчдын Үндэсний холбооноос мэдээллээ.

Ингэснээр аврах ажиллагаанд оролцох уулчид хүрэлцэхгүй, уулчин Х.Бумхишиг дээр маргааш очих төлөвлөгөөтэй байгаа аж.