Өнгөрсөн амралтын өдөр цахим сүлжээнд хиамны цехийн ажилчид ажлаа хийж буй зургаа олон нийтийн сүлжээнд цацсан нь цэвэр ахуйн байдал хангаагүй байсан тул иргэдийн дургүйцлийг ихээр хүргэсэн билээ. Тус мэдээллийн дагуу Мэргэжлийн хяналтын байгууллагаас төлөвлөгөөт бус хяналт шалгалтыг Сонгинохайрхан дүүргийн 20 дугаар хороо Толгойтын 12-35 тоотод байрлах “Зочин хүнс” ХХК-ийн үйл ажиллагаанд хийв.
Хяналт шалгалтаар тухайн аж ахуйн нэгж нь үйлдвэрлэлийн үйл ажиллагаа явуулаагүй, засварын ажил хийгдэж байгаа гэх тайлбарыг өгч улсын байцаагчийн тавьсан хууль ёсны шаардлагыг биелүүлээгүй, үйл ажиллагаанд саад учруулсан байна. Иймд мэдэгдэл хүргүүлж тус байгууллагад зөрчлийн хэрэг нээж, зөрчил шалган шийдвэрлэх ажиллагаа явуулж байна.
