Хамгаалалтын хувцас өмссөн оршуулгын компанийн ажилтнууд коронагаар амиа алдагчийн авсыг зөөж явна. Өндөр настны асрамжийн газар, Мюльхаус, Францын зүүн хэсэг. Зургийн эх сурвалж. AFP

• Амиа алдагсдын 7000 гаруй нь эмнэлэгт нас баржээ.
• 7 хоногийн дараа дуусах хөл хориог сунгана гэсэн хүлээлт байна. 
• Францад коронагийн халдварын оргил үе хараахан тохиогоогүй байгаа гэж эрүүл мэндийн албаныхан үзэв. 

  ---

   

"Ковид-19" өвчний улмаас амиа алдагсдын тоо Францад 10 мянга давлаа. Гуравдугаар сарын нэгнээс хойшх хамгийн сүүлийн мэдээллээр 10238 хүн амиа алдаад байна. Өнгөрсөн 24 цагийн хугацаанд гэхэд л эмнэлгүүдэд 607 хүн нас баржээ. 820 гаруй хүн гэр сувилгаанд байсан ч амиа алджээ. Гэр асаргаанд байсан хүмүүсийг хэдэн хоногийн дотор өвчнийг хяналтдаа авсан гэж үзэж байсан юм.

Халдвар тархалтын улмаас Франц улс 3 дугаар сарын 15-наас эхлэн нэг сарын хөл хорио тогтоосон бөгөөд зөрчсөн тохиолдолд торгууль ногдуулах шийдвэр гаргасан. Мягмар гаригт эрх баригчид 10-19 цагийн хооронд хүмүүсийг гадаа дасгал хийж, гүйхийг хориглосон байна.  Энэ хоригийг 4 сарын 15-аас сунгана гэсэн хүлээлт байна.

Францад цар тахал нь “нэмэгдэх шатандаа” хэвээр байна гэж Эрүүл мэндийн газрын дарга Жером Саломон мэдэгдсэн бөгөөд өдөр бүр нас барах, эмнэлэгт хэвтэх болон хүнд өвчний тохиолдол нэмэгдсээр байгаа гэжээ. Мөн тэрээр энэ бол “оргилд үе” биш гэдгийг онцолжээ.  

Гэсэн хэдий ч халдвар тохиолдлын өсөлтийн хурд удааширч байгаа шинж тэмдгүүд байгаа гэж үзэж байна. Хүнд хэлбэрийн халдвар өнгөрсөн 24 цагт 59-өөр л нэмэгдсэн нь өмнөх өдрүүдийнхээс буурсан үзүүлэлт бөгөөд 518 шинэ тохиолдлыг хүнд ангиллаас гарсан хүмүүс ихэвчлэн тэнцвэржүүлж байна гэлээ.

Францын эмч нар эмнэлгүүдийг хэт их ажиллуулах нь хамгийн муу хувилбар гэдэг байр сууриа илэрхийлсэн.

Мягмар гаригт Францын Ерөнхийлөгч Эммануэль Макрон Парисын зах хэсэгт орших тус улсын хамгийн олон халдвар бүртгэгдсэн газар нутгийн нэг болох Сент-Денис хотод очсон байна. Сент-Денист 3-р сарын сүүлийн хоёр долоо хоногт амиа алдагсдын тоо 63 хувиар нэмэгдсэн ч шалтгаан тодорхойгүй байна.

Г.Мандахбилэгт

Эх сурвалж: CNN