Дэлхий нийтэд тархаж байгаа “Ковид-19” цар тахлаас сэргийлэх үүднээс олноор цуглах үйл ажиллагаанд хөл хорио тогтоох зайлшгүй шаардлага гарсан билээ. Үүний улмаас 2020 оны нэгдүгээр сарын 27-оос эхлэн цэцэрлэг, сургуулийн үйл ажиллагааг түр хугацаагаар хаасантай холбогдуулан теле хичээлийг хоёрдугаар сарын 3-ны өдрөөс эхлэн бүх телевизүүдээр нэвтрүүлж эхэлсэн юм.

Тэгвэл сургуулийн өмнөх боловсролын хувьд теле хичээлийг анх удаа зохион байгуулж байгаа бөгөөд одоогийн байдлаар нэг хичээлийн үргэжлэх хугацааг 10 минутаар, 90 шинэ хичээлийг бэлтгэн 15 хичээлийн давталттай нийт 105 хичээлийг NTV телевизтэй хамтран ажиллаж орон даяар нэвтрүүлээд байна.

Боловсрол, соёл, шинжлэх ухаан, спортын яам, Боловсролын хүрээлэн, Багшийн мэргэжил дээшлүүлэх институт болон хичээл зааж буй багш нар хичээлийг бэлтгэх, зохион байгуулах ажлыг хамтран гүйцэтгэж байгаа юм. Мөн энэхүү үйл ажиллагаанд Хан-Уул дүүргийн 46, Сонгинохайрхан дүүргийн 170, Баянзүрх дүүргийн 146 дугаар цэцэрлэгүүд хамтран ажиллаж байгаа аж.

Эх сурвалж: Боловсрол, соёл, шинжлэх ухаан, спортын яам Боловсролын хүрээлэн