Мэргэжлийн хяналтын байгууллагын үйл ажиллагаа, хүнд сурталтай холбоотой асуудал гаргахгүй байх чиглэлд анхаарах ёстой талаар Шадар сайд С.Амарсайхан хэллээ. Тэрбээр "Төрийн бүх шатны албан тушаалтны хариуцлага, мэргэжлийн ур чадвар, ёс зүйн оргил, үлгэр дууриалал нь мэргэжлийн хяналтын байгууллагаас эхлэх ёстой. Үүнд удирдлага илүү анхаарч, алба хаагчидтайгаа ойрхон ажиллах ёстой. Мэргэжлийн хяналтын байгууллагын шинээр томилогдож буй дарга, удирдлагууд, одоо ажиллаж буй ажилтан алба хаагч нарт хэд хэдэн үүрэг чиглэлийг өгье. Нэг зүйлийг өөрчлөх ёстой. Сэтгэлгээ, хүлээлт, нийгмийн үнэлгээ дүгнэлтийн хувьд.

Шулуухан хэлэхэд, Мэргэжлийн хяналтын байгууллага МЭРГЭЖЛИЙН ДАРАМТЛАГЧ болсон мэт ойлголт нийгэмд бий болсон. Үүнийг засах ёстой. Энэ бол нийгмийн уур амьсгал, нийгмийн үнэлэлт дүгнэлт. Цөөхөн хэдэн албан тушаалтны хариуцлагагүй, ёс зүйгүй үйлдлээс болж мэргэжлийн хяналтын байгууллагын нэр хүнд ийм хэмжээнд хүрсэн.

Арван мянган доллар хахуульд аваад оймсондоо нууж байгаад баригдсан ажилтан бол мэргэжлийн хяналтын байгууллагын ажилтан. Иргэн, ААН байгууллагууд өр зээл тавьж, хумс хуруугаа хугалан өдөр шөнөгүй хүч хөдөлмөрөө зориулж, үр хүүхдийнхээ амьдрал, хувь заяаг шийддэг арван мянган доллар төрийн нэр барьсан авлигачины оймсны дайтай үнэлэгдэж байгаад ард түмэн эгдүүцэж, жигшиж байгаа. Өнөөдөр ч ийм үйлдэл үргэлжилж байгаа.

Хэдхэн сарын өмнө НМХГ-ын тамгын хэлтсийн дарга хоёр удаагийн үйлдлээр нэр бүхий ААН-ээс 82 сая төгрөгийн хахууль авч байгаад газар дээрээ баригдсан. Энэ бол бодитой, жигшмээр үйлдэл. Цаашид ийм үйлдэл гаргахгүй байхын төлөө байцаагч бүр ёс зүйтэй, мэргэжлийн түвшинд ажиллах шаардлага байна" гэлээ.