Түлхүүр мэдээлэл: 

• Нас барсан хүмүүст зориулж зуслан барьж байна.
• 400 орчим гудамжинд хаясан цогцос олжээ. 
• Хатуу хориотой дэглэмийн улмаас хүмүүсээ оршуулж чадахгүй байгаа аж.

Өмнөд Америкийн Эквадор улсын засгийн газар Гуаяакил хотод коронавирусийн халдвараар нас барсан хүмүүсийг оршуулах тусгай зуслан барьж байгааг өчигдөр мэдэгдлээ.

Тус хотод сүүлийн өдрүүдэд гялгар уутаар бүтээж гудамжинд хаясан 400 орчим хүний цогцос олдсон байна. Ихэнхийг нь Covid-19 өвчнөөр нас барсан байж болзошгүй хэмээн таамаглаж буй.

Эквадорт тархалтын төв цэг болоод байгаа Гуаяакил хотын эмнэлгүүд өвчтөнүүдээр дүүрч ачааллаа дийлэхээ больжээ. Мөн шарил хадгалах газруудын гадна урт дараалал үүссэн байна. Оршин суугчид гэр бүл, хамаатны хүмүүсээ хатуу дэглэмтэй хөл хорионы улмаас оршуулж чадахгүй байгаа аж. Цагдаагийн ажилтнууд өдөрт ойролцоогоор 150 хүний цогцсыг гэрээс нь цуглуулж байна.  

Тиймээс 3.8 сая оршин суугчтай Гуаяс мужид нас барсан хүмүүсийг оршуулах тусгай зуслан барьж байгаа гэж Эквадорын ерөнхийлөгч Ленин Морено мэдэгдлээ.

                                                                                                                                                                                                                                                                            Эх сурвалж: Reuters