Алдарт зураач Ван Гогийн бүтээлийг Голландын Ларен хотын “Сингер Ларен”-ы музейгаас хулгайлжээ. Орон нутгийн цагдаагийн мэдээлснээр музейн хаалгыг эвдсэн бөгөөд хэрэг даваа гаригийн шөнө гурван цагт болжээ.

Музейн зүгээс Ван Гогийн “Хаврын цэцэрлэг” (Spring garden) зургийг хулгайлсан хэмээн мэдэгдээд байна. Тус бүтээлийг Грониyгерийн музейгээс түр шилжүүлэн үзүүлж байжээ.

Уран бүтээлч Виллиам Хэнри Сингерийн нэрэмжит Сингер Ларены музей нь корона вирусний халдварын улмаас хаагдсан байжээ. Музейн захирал Жан Рудольф де Лорм сэтгүүлчдэд “хулгайн хэрэг үнэхээр хэцүү байдал үүсгэлээ” хэмээн хэлсэн байна.

Хулгайд алдсан зургийн үнийг одоогоор тогтоогоогүй гэлээ.

Сингер Ларены музейг Америкийн уран бүтээлч Виллиам Хэнри Сингер болон түүний эхнэр Анна нарын цуглуулгуудыг танилцуулахаар 1950 онд байгуулсан байна.

Даваа гаригийн байдлаар Голландад корона вирусний халдварын 11570 тохиолдол бүртгэгдсэн бөгөөд 864 хүн амиа алдаад байгаа юм.

Г.Мандахбилэгт