Түлхүүр мэдээлэл: 

• 30 хоногоор сунгах шийдвэр гаргажээ.
• Трамп өмнөх мэдэгдэлдээ "Улаан өндөгний баяр" гэхэд тархалт намжина гэж мэдэгдэж байжээ.
• Дэлхийн улс орнуудыг халдварын тоогоор тэргүүлж байна 

“COVID-19” халдварын тархалтыг хязгаарлах үүднээс орон даяар хэрэгжүүлсэн зайнаас харилцах удирдамжийг дахин 30 хоногоор сунгалаа гэж АНУ-ын Ерөнхийлөгч Дональд Трамп орон нутгийн цагаар ням гаргийн орой мэдэгджээ

Д.Трамп өмнө нь харилцааг хязгаарласнаар эдийн засагт нөхөж баршгүй хохирол учирч байна хэмээгээд, улаан өндөгний баяр гэхэд /дөрөвдүгээр сарын 12/ нөхцөл байдал хэвийн болно хэмээн мэдэгдэж байсан боловч бодлоо өөрчилсөн нь энэ юм. Уг удирдамжид 10-аас олон хүн нэг дор цуглахаас зайлсхийх, өндөр настай хүмүүсийг гэртээ байхыг зөвлөсөн юм.

"Америкийн олон сая иргэн коронавирусний халдвар авч, 100 мянга гаруй хүн нас барж болзошгүй" гэж халдварт өвчин судлаач, доктор Энтони Фаучи өмнө нь мэдээлсэн байна. АНУ-ын Ерөнхийлөгч энэ талаар хэлэхдээ, түүний хэлсэн өндөр тоонд итгэхгүй байна гэжээ.

АНУ-д халдвар авсан хүний тоо 140 мянга дөхөж, 2436 хүн нас барсан гэж Жонс Хопкинсийн нэрэмжит их сургууль мэдээлжээ. Тус улсад халдвар авсан хүний тоо өнгөрсөн долоо хоногт БНХАУ, Италийнхийг давсан юм. 

                                                                                                                                                                                                                                                                                  Эх сурвалж: CNN