"Токио 2020" зуны олимпын наадам үргэлжилж байна. Энэхүү наадамд манай улсаас 10 өөр төрөлд 43 тамирчин оролцсон. Үүний хамгийн залуу нь ширээний теннисний тамирчин Б.Болор-Эрдэнэ байсан юм. Тэрбээр энэ удаагийн тэмцээнд Монголчуудын салхийг хагалж оролцсон. Улмаар эхний тэмцээндээ ялалт байгуулсан нь амжилтын эхлэлийг сайн тавьж өглөө хэмээн магтан сайшааж байсан билээ.
Тэгвэл хамгийн отгон залуу тамирчин Б.Болор-Эрдэнэ "Олимпын наадмын хамгийн залуу тамирчин болж оролцсондоо баяртай байна. Ширээний теннисний спортын 61 жилийн түүхэнд анх удаа олимпт оролцож байгаа. Олимпын наадмын тэмцээн бол олон улсын наадмын тэмцээнийг бодвол хамгийн чухал, дэлхийн шилдэг тамирчид оролцдог. Цаашдаа ширээний теннисний ранк, эрэмбийг дээшлүүлэх, топ түвшинд өрсөлдөх зорилготой. Улам их хичээж илүү их амжилт гаргах болно" гэлээ.
