Коронавирусийн халдвараас сэргийлэх, үүссэн нөхцөл байдлыг амжилттай даван туулах үйл ажиллагаанд зориулж Улсын Их Хурлын Тамгын газрын ажилтнууд цалингаасаа 12.4 сая төгрөгийг Улсын Онцгой Комисст хандивлажээ. Хандивыг Улсын Онцгой комиссын дансанд өнөөдөр шилжүүлсэн байна.

Мөн Монгол Улсын нутаг дэвсгэрт коронавирусийн халдвар илэрсэнтэй холбогдуулан Улсын Их Хурлын удирдлага, Улсын Их Хурлын Тамгын газраас холбогдох арга хэмжээнүүдийг шат дараатай авч хэрэгжүүлж байна.

Үүний дотор Улсын Их Хурлын Тамгын газрын Ерөнхий нарийн бичгийн дарга Л.Өлзийсайханы захирамжаар Тамгийн газрын 12 хүртэл насны хүүхэдтэй болон жирэмсэн эмэгтэйчүүд, эрсдэлт бүлгийн ажилтнуудыг гуравдугаар сарын 10-наас эхлэн гэрээсээ буюу онлайнаар ажлаа гүйцэтгэх боломж олгож, ажлын үр дүнг тооцож ажиллахыг нэгжийн дарга нарт үүрэг болгосон байна.