Уулзвар, замд осол гарсан тохиолдолд цагдаа, даатгалын байгууллагыг хүлээж багагүй алдан, түгжрэлийг нэмэгдүүлдэг. Тэгвэл энэ асуудлыг цаашид хэрхэх талаар НИТХ-ын дарга А.Баяр хэлэхдээ "Зам тээврийн ослын 80 орчим хувийг хоёр машин шүргэлцсэн дуудлага эзэлдэг. Цагдаа ослын газар түгжрэлээс хамаарч дунджаар 15- 40 минутын дараа очдог бол ослын газар хэмжилт хийх, шаардлагатай мэдээллийг цуглуулахад багадаа 30 минутаас дээш хугацааг зарцуулдаг гэсэн тооцоо бий. Энэ хугацаанд тухайн ойр орчмын зам түгжирдэг. Түгжрэл үүсгэхгүй замаа богино хугацаанд хурдан чөлөөлдөг байх шийдлийг түгжрэлийг бууруулах ажлын хэсгийнхэн ярилцаж буй. Олон улсын жишгийн дагуу дрон нэвтрүүлэхийн тулд эхлээд стандартыг бий болгох шаардлагатай гэж үзлээ" гэв.