Ёс зүй, дэгийн байнгын хорооны өнөөдөр хуралдав. Энэ үеэр Ёс зүй, дэгийн байнгын хорооны дарга Б.Баярбаатар "УИХ-ын гишүүн Б.Найдалаа, П.Наранбаяр гишүүнд гар хүрсэн, янз бүрийн асуудлууд өнгөрсөн долоо хоногт болсон. Энэ талаар өөрсдөө зөрүүтэй мэдээлэл өгсөн учраас байнгын хорооноос дөрөвдүгээр сарын 7-нд тайлбар ирүүлэх тухай албан бичгийг хоёуланд нь хүргүүлсэн. 15-ны дотор хариу ирүүлэх ёстой. Тайлбарыг ирэхээр гишүүдэд танилцуулна. Өнөөдөр ямар ч үзэл бодол зөрж болно. Гэхдээ ухамсарт хүн бол учир зүйгээ хэл, амаараа олох ёстой. Үзэл бодол зөрлөө гээд бусдын биед халдаж болохгүй. Гэтэл "Харилцан зодолдсон бол зодоон болдог, би зүгээр, энэ зодоон биш" гэх мэт буруу зөрүү зүйлс ярьж болохгүй. Тэр тусмаа УИХ, ЗГ-ын гишүүд" гэдгийг онцлов.

Боловсролын сайд П.Наранбаярын зүгээс "Энэ бол санамсаргүй зүйл болсон. Бид зодолдоогүй" гэх тайлбарыг өгсөн бол УИХ-ын гишүүн Б.Найдалаа сэтгүүлчдэд мэдээлэл өгөхдөө "Маш санамсаргүй байдлаар П.Наранбаяр сайдын хөмсөг гэмтсэн. П.Наранбаяр сайдыг би цохиогүй. Бид хоёр зодолддог хүмүүс биш" гэсэн юм.