Засгийн газраас 0-18 насны хүүхдүүдэд 100 мянган төгрөгийг өнгөрөгч дөрөвдүгээр сарын 1-нээс эхлүүлэн, 2021 оны эхний хагас жил хүртэл олгох шийдвэр гаргасан. Энэ дагуу арваннэгдүгээр сард олгогдох хүүхдийн 100 мянган төгрөг маргаашнаас иргэдийн данс руу шилжиж эхэлнэ.
Үүнтэй холбогдуулан хүүхдийн мөнгөө бэлнээр авдаг байсан иргэд хөл хорионы үед арилжааны банкуудын салбарууд ажиллахгүй байгаатай холбоотойгоор хэрхэн мөнгөө авах талаар асуудалтай тулгарсан.
Улсын хэмжээнд 60 мянга гаруй иргэд хүүхдийн мөнгөө бэлнээр авдаг ба эдгээр иргэд өөрсдийн харилцах банктай холбогдон хүүхдийн мөнгөө хүлээж авах карт шинээр нээлгэх, мөн идэвхтэй ашиглаж буй данстайгаа холбох боломжтой байна. Банкууд карт нээлгэх хүсэлтийг хүлээж аван бэлэн болсон картыг иргэдийн гэрийн хаягаар хүргэх юм.
